2008-ci ildə bələdiyyələrdən Ədliyyə Nazirliyinə 2000-ə yaxın şikayət daxil olub Ədliyyə Nazirliyinin Bələdiyyələrlə İş Üzrə Mərkəzinin rəhbəri Mehdi Səlimzadə bələdiyyələrin fəaliyyəti ilə bağlı Milli Məclisin Regional məsələlər daimi komissiyasının iclasında hesabat çıxışı edib. İllik məruzənin bir sıra məqamları ilə komissiya üzvlərini tanış edən Mehdi Səlimzadənin sözlərinə görə, rəhbərlik etdiyi qurum öz işini ötən bir il ərzində millət vəkillərinin irəli sürdüyü təklif və iradlar əsasında qurmağa çalışıb. M.Səlimzadə qeyd edib ki, sözügedən qurumun, eləcə də Prezidentin İcra Aparatının müvafiq şöbəsinin, Həmkarlar İttifaqları Konfederasiyasının və digər aidiyyəti qurumların yaxından iştirakı ilə maarifləndirmə istiqamətində bələdiyyələr üçün 24 seminar-müşavirə təşkil olunub. M.Səlimzadənin dediyinə görə, 2008-ci ildə sözügedən quruma 1615 şikayət xarakterli müraciət daxil olub ki, onlardan da 80-i yerində öyrənilib: «Bir neçə müraciətdə qanunazidd hallar təsdiqləndiyindən, onlar hüquqi qiymət verilməsi üçün müvafiq dövlət orqanlarına göndərilib. Ötən bir il ərzində 17065 bələdiyyə aktı daxil olub və onlardan 436-sı sonradan ləğv edilib. 421 bələdiyyə üzvü ilə bağlı inzibati xəta protokolu tərtib olunub və bu yöndə 301 məhkəmə qərarı çıxarılıb. Ötən müddət ərzində 6090 hektar torpaq sahəsi yenidən bələdiyyələrin mülkiyyətinə qaytarılıb». Geniş müzakirələrdən sonra sözügedən məsələ parlamentin 2009-cu ilin yaz sessiyasının plenar iclasına tövsiyə olunub.
Heydər Əliyev Parkının əsaslı təmiri üçün bələdiyyə büdcəsindən 100 min manat ayrılıb Badamdar bələdiyyəsi dövlət torpaq fonduna aid sahələri qanunsuz şəkildə sənədləşdirib. Bu barədə məlumatı «Municipality.az» saytına həmin bələdiyyənin üzvü olan adının çəkilməsini istəməyən mənbə verib.Onun sözlərinə görə, 2007-ci ilin dekabrında Ədliyyə Nazirliyinin müvafiq strukturunun məktubuna məhəl qoymayan sədr ötən il ərzində onlarca torpaq sahəsini heç bir hüquqi əsası olmadan bələdiyyə sənədi ilə sənədləşdirib. Maraqlı məqam isə həmin vəsaitin bu gün hara xərclənməsi barədə heç bir bələdiyyə üzvündə məlumatın olmamasıdır. Hətta bələdiyyə sədrinin qanunsuz hərəkətləri Badamdar qəsəbə nümayəndəliyinin yekun iclasında da müzakirə olunub. Həmin iclasda o da qeyd olunub ki, 2008-ci ilin iyun ayında Heydər Əliyev Parkının əsaslı təmiri üçün bələdiyyə büdcəsindən 100 min manatdan artıq vəsait “silinib”. Maliyyə vəsaitinin silinməsini isə sədr tender və ya müsabiqə keçirmədən yalnız özünə məxsus “Emin-H” firmasının xətti ilə həyata keçirib. Ədliyyə Nazirliyinin Bələdiyyələrlə İş Mərkəzindən isə öyrəndik ki, daxil olan şikayətlər əsasında hazırda Badamdar bələdiyyəsində maliyyə fəaliyyəti ilə bağlı araşdırma aparılır. Badamdar bələdiyyəsinin sədri ilə əlaqə saxlamaq istəyimiz alınmadı.
Vüsalə RÜSTƏMOVA www.bizimyol.az
P.S.Municipality.az saytının yazdıqları bir daha öz təsdiqinin tapdı. Artıq Ədliyyə nazirlininin müvafiq strukturu tərəfindən bələdiyyədə araşdırmalar aparılır.
Yanvarın 30-da Milli Məclisin regional məsələlər daimi komissiyasının 2009-cu ilin yaz sessiyasında ilk iclası keçirilmişdir. Komissiyanın sədri Arif Rəhimzadə 2008-ci ilin payız sessiyası dövründə yerinə yetirilmiş qanunvericilik işləri barədə məlumat vermişdir. Bildirilmişdir ki, komissiyanın bu dövrdə keçirilmiş 3 iclasında 9 məsələ, o cümlədən 7 qanun layihəsi müzakirə olunmuşdur. Hesabat dövründə inzibati ərazi quruluşu ilə bağlı işlər üzrə komissiyada işçi qrupları yaradılmış, məsələlər yerində öyrənilmişdir. Komissiya üzvlərinin beynəlxalq təşkilatlarla əməkdaşlıq çərçivəsində xeyli iş apardığı, ölkədə keçirilmiş bələdiyyə tədbirlərində iştirak etdikləri diqqətə çatdırılmışdır. Sonra komissiyanın yaz sessiyasında görəcəyi işlərin planı müzakirə olunmuşdur. Milli Məclisin 2009-cu il yaz sessiyasının müzakirəsinə çıxarılması nəzərdə tutulan məsələlər barədə məlumat verən komissiyanın sədri demişdir ki, fevralda “Bələdiyyələrin fəaliyyətinə inzibati nəzarəti həyata keçirən orqanın illik məruzəsi”, “Ərazi quruluşu və inzibati ərazi bölgüsü haqqında” Azərbaycan Respublikasının Qanununa əlavələr və dəyilikliklər edilməsi barədə”, “Azərbaycan Respublikasının ərazi vahidlərinin və inzibati ərazi dairələrinin Dövlət reyestrinin aparılması və onlara şəhadətnamələrin verilməsi haqqında” Əsasnaməyə dəyişiklik edilməsi barədə”, martda “Bələdiyyələrin əraziləri və torpaqları haqqında” Azərbaycan Respublikasının Qanununa əlavə edilmiş “Azərbaycan Respublikasında bələdiyyələrin siyahısı”na bəzi əlavə və dəyişikliklər edilməsi barədə” qanun layihələri müzakirə olunacaqdır. Arif Rəhimzadə, həmçinin Milli Məclisin cari ilin payız sessiyasının müzakirəsinə təqdim edilmək üçün hazırlanan qanun layihələri barədə də məlumat vermişdir. İclasda bələdiyyələrin fəaliyyətinə inzibati nəzarəti həyata keçirən orqanın illik məruzəsi də dinlənilmişdir. Ədliyyə Nazirliyi Bələdiyyələrlə İş Mərkəzinin rəisi Mehdi Səlimzadə bildirmişdir ki, ötən il maarifləndirilmə tədbirləri çərçivəsində keçirilmiş 24 seminar-müşavirədə 1214 nəfər bələdiyyə üzvü və qulluqçusu iştirak etmişdir. Bu tədbirlərdə əsasən insan hüquqlarının qorunmasında bələdiyyələrin rolu, bələdiyyələrdə korrupsiya problemləri və onların qarşısının alınması, bələdiyyələrdə vətəndaşların müraciətlərinə baxılması və s. məsələlər müzakirə olunmuşdur. Sonda iş planı təsdiq edilmiş, bələdiyyələrin fəaliyyətinə inzibati nəzarəti həyata keçirən orqanın illik hesabatı Milli Məclisin müzakirəsinə tövsiyə olunmuşdur. İclasda bir sıra bələdiyyələrin sədrləri də iştirak etmişlər.
2008-ci ildə bələdiyyələrlə bağlı 15 cinayət işinin açılması üçün sənədlər hüquq-mühafizə orqanlarına göndərilib. APA-nın xəbərinə görə, bu barədə Ədliyyə Nazirliyinin Bələdiyyələrlə İş Mərkəzinin rəhbəri Mehdi Səlimzadənin bu gün Milli Məclisin Regional məsələlər daimi komissiyasının iclasında müzakirə olunan illik məruzəsində qeyd olunub. Məruzədə bildirilib ki, ötən il bələdiyyələrlə bağlı mərkəzə 1615 müraciət daxil olub, onlardan 80-i şikayət xarakterli olub, bələdiyyələrin verdiyi 635 aktın ləğv olunması tələb edilib. Onlardan 436-sı ləğv edilib, 421 bələdiyyə sədri haqqında inzibati xətalara yol verilməsi barədə protokol tərtib olunub. 6090 hektar torpaq sahəsinin verilməsi isə qanunsuz hesab edilib və həmin torpaqlar bələdiyyə mülkiyyətinə qaytarılıb. Məruzədə o da qeyd edilib ki, hazırda Azərbaycanda 2757 bələdiyyə var. Komissiya məruzəni Milli Məclisin iclasına tövsiyə edib.
Domen adlarının qeydiyyatından əsasız olaraq imtina halları müşahidə olunur. Hələki normal qeydiyyat Qaydalar yoxdur. Milli internet ünvanların - .az domeninin qeydiyyatı sahəsində mövcud vəziyyətlə bağlı Xeberler.az –ın Azərbaycan İnternet Forumunun prezidenti Osman Gündüz ilə müsahibəsi. Osman müəllim, hazırda milli internet ünvanların - domenlərin qeydiyyatı prosesi necə həyata keçirilir , bu proses yerli və beynəlxalq normala cavab verirmi? Hansı qurum səlahiyyətlidir az domeninin qeydiyyatı üçün?
-Hazırda qeydiyyat prosesində inhisarçılıq mövcuddur. Şəffaflıq yoxdur. Domen adlarının qeydiyyatından əsasız olaraq imtina halları müşahidə olunur. Hələki normal qeydiyyat Qaydalar yoxdur. O ki qaldı hüquqi status məsələsinə, bu proses uzun müddət AzCom adlanan qurumun qeyri-qanuni olaraq səlahiyyətində olub və qeydiyyat prosesi İnternet ictimaiyyətin ciddi qınaqları ilə üzləşib. AİF tərəfindən bu prosesin legitimləşdirilməsi istiqamətində ciddi addımlar atılıb. Bir neçə dəfə müəyyən dövlət və özəl qurumlar tərəfindən qeyri-qanuni olaraq legitimləşmə prosesi aparmaq istəyərkən AİF İnternet ictimaiyyətin dəstəyi ilə , bu sahədə əsas qurum olan İCANN –nin köməkliyi ilə onun qarşısını almışdı. Eyni zamanda indiki nazir yeni fəaliyyətə başlayan an da .az domeninin tamamilə beynəlxalq normalara uyğun olaraq qeydiyyat prosedurasının qurulması haqqında göstərişlər vermişdi. Lakin təəssüf ki, RİTN-nin və digər əlaqədar qurumların iştirakı ilə aparılan legitimləşmə prosesi birdən-birə yarımçıq saxlanıldı.
Azərbaycan Rabitə və İnformasiya Texnologiyaları Nazirliyindən bildirmişlər ki, “Netty-2009” akademiyasının ilk iclasında yeni nominasiyalar müzakirə edilmişdir. İclasda “Netty-2009 milli internet mükafatı” müsabiqəsindən kənar 3 kateqoriya təsis edilmişdir. Qərara alınmışdır ki, 2009-cu ilin Azərbaycanda “Uşaq ili” elan olunması çərçivəsində “Ən yaxşı uşaq saytı” (“Uşaqlar internetdə”), Bakının 2009-cu ildə islam mədəniyyətinin paytaxtı elan olunması çərçivəsində “Bakı haqqında ən yaxşı sayt” (“Paytaxt”) və “Ən yaxşı dizayn” nominasiyaları keçirilsin. Bundan əlavə “İlin informasiya texnologiyaları hadisəsi” adlı yeni fəxri nominasiya da təsis edilmişdir
Ekologiya və Təbii Sərvətlər Nazirliyi 6 saylı Ərazi Ekologiya və Təbii Sərvətlər şöbəsi nəzarət etdiyi inzibati ərazilərdə (Göyçay, Ucar, Zərdab, Kürdəmir) reyd və yoxlamalar keçirib. Şöbədən verilən məlumata görə yoxlamalar nəticəsində ötən il ərzində 82 akt və 53 protokol tərtib olunub. Məlumatda deyilir ki, su mühafizəsi sahəsində 10 akt tərtib olunmaqla yanaşı 710 manat məbləğində məcburi ödəmə hesablanıb. Atmosfer havasının mühafizəsi sahəsində 6 akt, 1090 manat məcburi ödəmə, yerin təkinin mühafizəsində 3 akt və 3 protokol, ətraf mühitə qanunsuz məişət və istehsalat tullantılarının yerləşdirilməsinə görə 16 akt və 15 protokol, floranın mühafizəsi sahəsində 41 akt və 6 protokol, faunanın mühafizəsi sahəsində 3 akt və 12 protokol, torpağın mühafizəsi sahəsində isə 3 akt və 3 protokol tərtib olunub. Müvafiq olaraq cərimələr tərtib olunub və onların ödənməsi təmin olunub. Ümuniyyətlə, şöbə tərəfindən il ərzində təbiətə vurulan ziyan və törədilmiş inzibati xətalarla əlaqədar Təbiəti Mühafizə Ehtiyat Fonduna 18614 manat vəsait ödənib.
Lənkəran bələdiyyəısindən municipality.az saytına daxil olan məlumata görə, 2008-ci il ərzində bələdiyyəyə 230 məktub, ərizə və şikayət daxil olmuşdur. O, cümlədən, idarə və təşkilatlardan daxil olan məktubların sayı 116 ədəd, vətəndaşlar tərəfindən daxil olan ərizə və şikayətlərin sayı 104 ədəd təşkil etmişdir. Daxil olan ərizələrdə 11 ədəd torpaqla bağlı, 2 ədəd qulluğa qəbulla bağlı, 28 ədəd maddi yardımla bağlı və 13 ədəd digər məsələlərlə bağlı müraciətlər olmuşdur. “Vətəndaşların müraciətlərinə baxılması qaydası haqqinda” Azərbaycan Respublikası Qanununa müvafiq olaraq daxil olan məktub, ərizə və şikayətlərin hər birinə vaxtında baxılmış, nəticəsi barədə onlara məlumat verilmişdir. Müxtılif məsələlərlə bağlı bələdiyyə aparatı tərəfindən 749 vətəndaş qəbul edilmişdir. Vətəndaşların bələdiyyəyə edilən müraciətlərinə əsasən 26 nəfərə yardım göstərilmiş, o cümlədən 2 nəfərə vergi borcunu ödəmək üçün yardım edilmişdir.Verilən məlumata görə, ümumilikdə 2008-ci il ərzində bələdiyyə tərəfindən 14900 manatlıq yardımlar edilmişdir. Bu ötən ilin müvafiq dövrünə görə 3,9 dəfə çoxdur. Yardım alanlar əsasən müharibə əlilləri və veteranlar, maddi durumları ağır olan vətəndaşlar olmuşdur. Böyük Vətən Müharibəsi veteranlarına 500 manat məbləğində yardım verilmişdir. Bunlardan başqa Novruz bayramı ilə əlaqədar vərəm dispanserinə 350 manat məbləğində dərman preparatları alınmış, həmçinin imkansız ailələrə 452 manatlıq ərzaq yardımları edilmişdir.
268
