Bələdiyyələr bir qurum kimi Azərbaycan Respublikasında fəaliyyətə başlayanda onun adından xoflananlar və ağız büzənlər kifayət qədər çox oldu. Bu da bir tərəfdən baxanda tamam başqa ictimai-siyasi formasiyanın təfəkkürü ilə formalaşmış düşüncə sahibləri üçün təbii və başadüşülən reaksiya idi. Məhz belə həssas bir məqamda ulu öndər Heydər Əliyevin həmişə olduğu kimi bu dəfə də məsələyə uzaqgörənliklə yanaşması və ölkənin inkişaf strategiyasına uyğun bir yol seçməsi məsələni bələdiyyələrin xeyirinə dəyişdi və bələdiyyələr varlıqları üçün bu görkəmli şəxsiyyətə borcludurlar. Bu danılmaz bir həqiqətdir ki, ulu öndərin qətiyyəti bələdiyyələrin ölkəmizdə normal fəaliyyət göstərməsini təmin etdi və ona dayaq durdu...
Keçən zaman məsafəsi onun bu mövqeyinin də tamam düzgün olduğunu bir daha təsdiqlədi. İndi artıq bələdiyyələr çoxsaylı problemlərin həlli istiqamətində xeyli işlər görmüş və uğurlar qazanmışdır. Bir sözlə, artıq bələdiyyə oturuşub və öz yerini möhkəmləndirib . Heç şübhəsiz ki, dövlət başçısı İlham Əliyevin də ardıcıl siyasəti bu məsələdə mühüm rol oynayıb.
Əli Bayramlı şəhər bələdiyyəsi də respublikamızın ən nüfuzlu yerli özünüidarəetmə orqanlarından biri kimi öz fəaliyyətini günbəgün inkişaf etdirir və genişləndirir, şəhərin sosial-iqtisadi problemlərinin həllində, abadlıq- quruculuq işlərində öncüllük nümayiş etdirir. Şəhər bələdiyyəsinin sədri Əfzəlağa Babayevlə son iki il yarım müddət ərzində görülmüş işlər, qazanılmış nəticələr və perspektiv planlar barədə söhbət edirəm.Bələdiyyə sədri sualları cavablandırır.
-
Əli Bayramlı şəhər bələdiyyəsinin ikinci seçkidən sonrakı fəaliyyətini necə dəyərləndirmək olar?
- İlk öncə onu vurğulamağı özümə borc bilirəm ki, böyuklüyündən-kiçikliyindən asılı olmayaraq bütün bələdiyyələr Azərbaycan Respublikasındakı fəaliyyətlərinə və özlərini təsdiq etməyə görə ulu öndər Heydər Əliyevə minnətdar olmalıdırlar. Çünki bu, açıq-aşkar hamıya bəlli idi ki, məhz onun ciddi səyləri nəticəsində bələdiyyələr “həyat vəsiqəsi” qazana bildilər. Məlumat üçün bildirim ki, mən 2005-ci ildə Əli Bayramlı şəhər bələdiyyəsinin sədri seçilmişəm və təbii ki, bu dövr ərzində gördüyümüz işlər barədə məmnuniyyətlə məlumat verə bilərəm. Bunu bəri başdan vurğulamaq istəyirəm ki, Azərbaycan Respublikası regionlarının sosial-iqtisadi inkişafı Dövlət Proqramının həyata keçirilməsində Əli Bayramlı şəhər bələdiyyəsi də iştirak edir. Təsadüfi deyil ki, 2005-2008-ci illər üçün şəhərin sosial-iqtisadi inkişafı barədə şəhər bələdiyyəsinin əsas planı var. 2005-2006-cı illərdə və 2007-ci iln birinci yarısında bələdiyyənin vəsaiti hesabına bu işlər həyata keçirilmişdir.
Görkəmli şairimiz Səməd Vurğunun adını daşıyan 3600 kvadrat metr sahəsi olan park yenidən qurulmuş, şairin büstü qranit daşla işlənmişdir. Köhnə şəhərdə qocalar və pensiyaçılar üçün 1500 kvadratmetrlik ərazidə park salınmışdır. Kür çayının daşması ilə əlaqədar bəndin təhlükə törədə bilən hissəsində dəmir-beton bərkitmə işləri aparılmışdır. M.Ə.Rəsulzadə küçəsində ümumi sahəsi 13131kvadratmetr olan nümunəvi məhəllə salınmış, burada uşaq və yaşlıların istirahəti üçün normal şərait yaradılmışdır. 20 saylı şəhər orta məktəbinin dam örtüyü şifer materialları ilə tamamilə təzələnmişdir. 21 saylı orta məktəbdə sanitar qovşağı tikilib istifadəyə verilmişdir. Şəhərin “Nərgiz”, “Şəfəq”, “Yasəmən” uşaq bağçalarında və Bayramlı qəsəbəsinin uşaq bağçasında abadlıq, tikinti-təmir işləri görülmüşdür.
Böyük Vətən müharibəsində həlak olan soydaşlarımızın xatirəsinə ucaldılmış abidənin ərazisi tamet örtüklə döşənmiş, abadlaşma işləri aparılmışdır. Hazırda mərkəzi xəstəxananın dördüncü mərtəbəsində əsaslı təmir aparılır. Tibbi sanitar hissədə təmir başa çatdırılmışdır. Şəhərin şimal hissəsində 50 hektara yaxın sahədə hər birinin uzunluğu 720 metr olan doqquz küçə salınmış, bu küçələrdə 650 nəfərə fərdi ev tikmək üçün torpaq sahəsi ayrılmışdır. Hazırda həmin mikrorayonda sürətlə fərdi evlər tikilir. Qeyd etimək istəyirəm ki, eyni zamanda S.Zeynalov, T.İsmayılov, M.Əsədov, L.-t İbrahimov küçələrinə 6400 kvadratmetr asfalt-beton döşənmişdir. Həmçinin şəhərin 42 küçəsində abadlaşdırma, tikinti-təmir işləri aparılmışdır. Hazırda 11 kilometr məsafəni əhatə edən ( şəhərin təzə və köhnə hissəsini əlaqələndirən ) bələdiyyə marşrutu üçün küçələr , o cümlədən N.Nərimanov, Energetik, Xaqani, Naxçıvan küçələrində tikinti işləri qurtarmaq üzrədir. Heydər Əliyev parkının, M.Ə.Rəsulzadə küçəsi boyu xiyabanın , 20 yanvar küçəsindəki parkın və Şəhidlər Xiyabanının yenidən qurulmasında, küçələrin, piyadalar üçün səkilərin tikinti-təmir işlərinin aparılmasında, şəhər üzrə abadlıq-quruculuq işlərinin görülməsində şəhər bələdiyyəsi İcra hakimi yyəti ilə birgə səmərəli fəaliyyət göstərmişdir və bundan sonra da göstərəcəkdir. 2005, 2006 və 2007-ci ilin birinci yarısında yuxarıda qeyd edilən abadlıq, quruculuq, tikinti-təmir, yenidənqurma işlərinə şəhər bələdiyyəsinin büdcəsindən 782000 yeni Azərbaycan manatı sərf edilmişdir.
- Bəs bu qədər abadlıq-quruculuq işlərini həyata keçirən bələdiyyənin özundə vəziyyət necədir?
– Hamının bildiyi bir atalar məsəli var: aləmi bəzər,özü lüt gəzər. Deyim ki, biz bu “prinsipi” pozmuşuq, yəni bir az da oturduğumuz yerin səliqə-sahmanına diqqət ayırmışıq. Belə ki, bələdiyyənin yerləşdiyi inzibati binada müasir standartlara uyğun gələn əsaslı təmir işləri aparılaraq bələdiyyə qulluqçularının istifadəsinə verilmişdir. Əlbəttə, biz işimizi təkcə bununla bitmiş hesab etmirik, eyni zamanda əməkdaşlarımızın qayğısına daha çox qalmağı yaddan çıxarmırıq. Məhz bu dediklərimin nəticəsidir ki, aparatda 11 ştat vahidi artırılmış, orta əmək haqqı 40 manatdan 87 manata qaldırılmış, bələdiyyənin büdcəsi 2004-cü ilə nisbətən 14 dəfə artmış, əhalinin imkansız təbəqəsinə edilən maddi yardım 5460 manata çatdırılmışdır.
- Bu gün ən aktual məsələlərdən biri də sahibkarlığın inkişafıdır. Məlumdur ki, ölkə başçısı bu sahəyə xüsusi həssaslıqla yanaşır. Əli Bayramlıda bələdiyyə- sahibkar münasibəti necə tənzimlənir?
- Qeyd etdiyiniz kimi, sahibkarlığın inkişafı ölkənin tərəqqisində mühüm faktora çevrilib və sabahımızı onsuz təsəvvür etmək mümkün deyil. Bəllidir ki, möhtərəm Prezidentimiz dəfələrlə bəyan edib ki, sahibkarlara fəaliyyət üçün normal şərait yaradılmalıdır. Bu da, sözsüz ki, sahibkarın özündən daha çox cəmiyyətin inkişafı və tərəqqisi üçün labüddür. Yeri gəlmişkən, bunu da xüsusi vurğulamaq istəyirəm ki, “bələdiyyə” və “sahibkar” bir məfhum kimi yeni dövrün anlayışlarıdır və burada qarşılıqlı anlaşma, şübhəsiz ki, yüksək səviyyədə olmalıdır. Məhz elə buna görədir ki, şəhər bələdiyyəsi sahibkarlığın inkişafına xüsusi diqqət verir. Belə ki, sahibkarlığın inkişafını genişləndirməkdən ötrü onların istifadəsində və icarəsində olan 31 hektar torpaq sahəsi özəlləşdirilmişdir. Eyni zamanda işsizliyi və evsizliyi azaltmaq və minimuma endirmək məqsədilə böyük sahibkarlığı inkişaf etdirməyi də daha münasib hesab edirik. Bu məqsədlə böyük tikinti şirkətlərinə kifayət qədər torpaq sahəsi verilmişdir. Hazırda 1,9 hektar sahədə müasir tipli diaqnostik mərkəz, 3 hektar sahədə ticarət mərkəzi tikilir. 26 çoxmərtəbəli binanın tikintisini həyata keçirən “Şəfəq”, “Komfort”, “Ana Kür” tikinti şirkətlərinə torpaq sahələri ayrılmışdır. Yeni çoxmərtəbəli yaşayış binalarının tikintisində vacib olduğu üçün iki beton zavodu tikilərək istifadəyə verilib . Əlbəttə, sahibkarlığın inkişafı üçün həyata keçirdiyimiz və gələcəkdə reallaşdırmağı nəzərdə tutduğumuz planlar Əli Bayramlı şəhərinin ümumi inkişafı və tərəqqisi üçün mühüm rola malik olduğundan bu istiqaməti dediyim kimi, ardıcıllıqla davam etdirmək niyyətindəyik.
– Yeni layihələrin həyata keçirilməsi istiqamətində şəhər bələdiyyəsi hansısa təcrübəyə malikdirmi?
– Qeyd etmək istəyirəm ki, Əli Bayramlı şəhər bələdiyyəsi təkcə yerli iş təcrübəsi ilə işini bitmiş hesab etmir. Beynəlxalq təcrübədən öyrənmək, bəhrələnmək və səmərəli istifadə etmək bizim üçün prioritet məsələlərdəndir. Dediklərimə misal olaraq İFES təşkilatı, Britiş Konsul və Ədliyyə Nazirliyinin bələdiyyələrlə iş mərkəzi ilə birlikdə 2005-ci iln iyun ayının birindən 2006-cı ilin mart ayının 1-dək “Bələdiyyələr və onların ərazisində yaşayan əhaliyə texniki yardım” layihəsi üzrə apardığımız araşdırmanı xatırlada bilərəm. Layihədə bələdiyyənin strateji planını tərtib etmək, bələdiyyə büdcəsini işləyib hazırlamaq və əməli olaraq uşaq poliklinikasında peyvənd kabinetini təşkil etmək, “Nərgiz” uşaq bağçasında uşaqlar üçün əyləncə qurğularını yaratmaq, 21 saylı orta məktəbin idman meydançasını qurmaq qarşıya məqsəd kimi qoyulmuşdu. Bizim üçün çox fərəhləndirici oldu ki, bu layihə müvəffəqiyyətlə həyata keçirildi və bu da təcrübə mübadiləsi olaraq şəhər bələdiyyəsinin inkişafına kömək etdi. Bu cür misalların sayını yenə artırmaq olar. Ancaq əsas odur ki, bu sahəyə də diqqət və maraq həmişə aktuallığını saxlasın. Belə bir misal var:dünya gör-götür dünyasıdır. Öyrənmək isə peyğəmbərimizin də dediyi kimi, heç vaxt gec deyil. Mən buna qətiyyətlə inanıram ki, vaxt gələcək biz öyrəndiyimiz kimi bizdən də öyrənəcəklər.
- Sizcə, bələdiyyənin fəaliyyəti arzu olunan səviyyədədirmi və əhalini razı salırmı?
-
Bilirsiniz, əgər bu gün hər şeyin ideal səviyyədə olduğunu iddia etsək, bu, çox şişirtmə və yanlış olar. Ancaq elə bilirəm ki, seçdiyimiz yol məhz insanlara, onların qayğı və problemlərinə həssaslıqla yanaşıb, həll etməkdirsə, zənnimcə, elə də güclü narazılıqlar olmamalıdır. Bir də ki , bu məlum həqiqətdir ki, görülən işdən razı, yaxud da narazı qalmaq olar, olmayan işdən kim razı-narazı qala bilər ki? Bu, olsa-olsa olmayan duaya “amin” demək kimi bir şey olardı. Sözsüz ki, şəhər bələdiyyəsinin qarşısında daha çox və mühüm vəzifələr durur.Yəni görüləsi işlər, öz həllini gözləyən problemlər hələ qarşıdadır. Regionların sosial-iqtisadi inkişafı istiqamətində bizi mühüm vəzifələrin həyata keçirilməsi, əhaliyə yeni iş yerlərinin açılması gözləyir. Biz eyni zamanda sakinləri narahat edən çoxsaylı problemlərin həllində də dövlətimizə yaxından kömək göstərməliyik. Bütün bunlara isə heç şübhəsiz ki, şəhər bələdiyyəsinin özünün daimi maliyyə mənbələrini – xidmət və istehsal sahələrini yaratmaqla nail olmaq olar
Səməd HÜSEYNOĞLU
“Xalq qəzeti”nin
bölgə müxbiri
|
0 | 
1402
